Ryanair ka kërkuar të qetësojë konsumatorët pasi një pasagjer u përthith pjesërisht nga një dritare e thyer gjatë një fluturimi, duke thënë se avioni i përfshirë është ndoshta “më i sigurti i ndërtuar ndonjëherë”.
Incidenti ndodhi më 10 korrik gjatë fluturimit nga Selaniku (Greqi) për në Memmingen pranë Mynihut (Gjermani). Ljubisa Karović, 61-vjeçar serb, u përthith nga dritarja akrilike pasi ajo u thye nga një pjesë e motorit. E shoqja, Svetlana Grković, së bashku me dy pasagjerë të tjerë, e mbajtën për këmbësh dhe e tërhoqën përsëri brenda avionit.
Neil Sorahan, shefi financiar i Ryanair, tha se ka pasur “fjalë për fjalë qindra miliona fluturime” me këta avionë Boeing 737 në të gjithë botën. “Ata janë ndoshta avionët më të sigurt të ndërtuar ndonjëherë, mirëmbahen në nivel të lartë dhe kemi ekuipazhe shumë të trajnuara”, u shpreh ai për The Guardian.
Hetimet e para tregojnë se avioni u dëmtua nga një objekt i huaj. Michael O’Leary, drejtori ekzekutiv i Ryanair, u tha analistëve se treguesi fillestar sugjeron dëmtimin e motorit nga një objekt i huaj gjatë ngritjes në Selanik, por shtoi se “nuk mund ta themi me siguri”.
Avioni, i cili ishte 18 vjeç dhe motori i tij ishte servisuar dhe riparuar plotësisht dy vitet e fundit, humbi presionin dhe bëri një ulje emergjente. Bordi Kombëtar i Sigurisë së Transportit i SHBA-ve (NTSB) po heton incidentin. Një raport paraprak pritet brenda rreth 28 ditësh, i ndjekur nga një raport më i detajuar.
Sorahan vlerësoi ekuipazhin: “Ekuipazhi ynë bëri një punë fenomenale dhe e ktheu avionin në Selanik. Të gjithë pa përjashtim zbritën nga avioni. Ishte një punë e shkëlqyer nga ana e ekuipazhit të kabinës dhe pilotëve.” Ai shtoi se është “shumë herët” për të diskutuar çështjen e dëmshpërblimit për çiftin, pasi hetimi ende nuk ka përfunduar.
Ngjarja ngjan me dy incidente të ngjashme në fluturimet e Southwest Airlines me Boeing 737 në vitet 2016 dhe 2018, duke nxitur një rivlerësim nga Administrata Federale e Aviacionit (FAA).